賭枱上的打火機

       以前做廚房落場有兩個半鐘頭  每日都兩個半鐘頭  邊有咁多事做  就去睇戲啦   執張紙皮去後樓梯瞓覺啦   去健身中心啦  去打遊戲機啦   但係最多同事選擇嘅就係賭錢   通常都係十三張 鋤大d 同埋 一鋪就可以冇左幾個月糧 嘅 showhand   試過有個同事玩三公一晚輸咗十幾萬( 係20年前 ) 第二日已經再冇返工啦 !
       賭錢有好多方式 幾乎每人都有佢自己嘅心得   但係有一種方式我喺廚房見咗十年  而又印象深刻   用喺每個人身上嘅結果都係一樣嘅   ~ 就係賭枱上嘅打火機   輸到要掉個打火機出去當100 輸埋   再調包煙出去當300 輸埋  再調埋個銀包出去當1000 輸埋   如此類推而結果只有兩個     一個係莊家唔再受   另一個結果就係輸到要走佬   而我深信呢一種(行為)就係惡性循環既一個例子